Involviment tal-partijiet ikkonċernati
L-involviment mal-partijiet ikkonċernati huwa kruċjali għax-xogħol tal-EFSA u jirrifletti l-impenn tagħha favur il-ftuħ, it-trasparenza u d-djalogu.
Min huma l-“partijiet ikkonċernati” tal-EFSA?
Il-partijiet ikkonċernati tal-EFSA huma organizzazzjonijiet rappreżentattivi li għandhom interess fix-xogħol tal-Awtorità jew fis-settur usa’ tal-ikel u tal-għalf. L-EFSA taqsam il-partijiet ikkonċernati f’seba’ gruppi ewlenin:
L-organizzazzjonijiet tal-konsumatur
 | Organizzazzjonijiet li l-għanijiet primarji tagħhom huma li jiddefendu u jippromwovu l-interessi tal-konsumaturi. |
L-NGOs u l-gruppi ta’ promozzjoni
 | Gruppi mhux governattivi li huma indipendenti mill-industrija, mill-kummerċ u min-negozju u li għandhom bħala l-objettivi u l-attivitajiet primarji tagħhom il-promozzjoni tal-protezzjoni tal-ambjent jew is-saħħa u s-sigurtà tal-konsumaturi. Il-gruppi ta’ promozzjoni jistgħu jkunu kkonċernati bi kwistjonijiet usa’ u orizzontali mhux relatati direttament mas-sigurtà tal-ikel bħall-post tax-xjenza fit-tfassil tal-politika jew it-trasparenza fl-amministrazzjoni pubblika. |
In-negozju u l-industrija tal-ikel
 | Assoċjazzjonijiet li jirrappreżentaw l-interessi tal-kumpaniji li joperaw fi kwalunkwe settur tal-industrija rilevanti għax-xogħol tal-EFSA. |
Id-distributuri u l-HORECA
 | Organizzazzjonijiet li jirrappreżentaw l-interessi tal-partijiet ikkonċernati involuti fil-preparazzjoni, id-distribuzzjoni u l-provvista tal-ikel, bħal bejjiegħa bl-ingrossa, bejjiegħa bl-imnut, lukandi, ristoranti u fornituri tal-ikel (HORECA). |
L-assoċjazzjonijiet tal-prattikanti
 | Organizzazzjonijiet li jirrappreżentaw professjonisti li jaħdmu f’oqsma rilevanti għas-sigurtà tal-ikel u l-mandat tas-saħħa pubblika tal-EFSA, bħal tobba mediċi, esperti tad-dieta, infermiera, spiżjara u veterinarji. |
L-akkademja
 | Gruppi li jirrappreżentaw komunitajiet xjentifiċi u teknoloġiċi, inklużi soċjetajiet xjentifiċi, universitajiet, istituti ta’ riċerka jew gruppi oħra ta’ akkademiċi. |
Il-bdiewa u l-produtturi primarji
 | Organizzazzjonijiet li jirrappreżentaw dawk fil-bidu tal-katina alimentari. Dawn jistgħu jinkludu, pereżempju, assoċjazzjonijiet ta’ bdiewa, sajjieda, forestiera, nissiela, dawk li jrabbu n-naħal u ortikulturisti. |